Korotçenkodan SENSASİON ETİRAF – “Ukraynanın şərtlərimizi qəbul etməyəcəyini bilirdik”

“İstanbulda keçirilən danışıqların gedişi və nəticələri, o cümlədən ikinci raundun yekunları göstərir ki, Kiyev Rusiya təkliflərinə cavab vermək niyyətində deyil. Buna görə də Moskva üçün vacibdir ki, Birləşmiş Ştatların prezidenti Donald Trampın administrasiyası ilə ortaq yanaşma prinsipi qeydə alınsın. Bu yanaşmanın əsası budur ki, sülh danışıqları Ukrayna böhranının həllinin açarıdır”.

Sülh yalnız bu halda mümkündür

Bu fikirləri Bizim.Media-ya açıqlamasında Xəzər Strateji Araşdırmalar İnstitutunun baş direktoru İqor Korotçenko deyib. İstanbul danışıqlarının növbəti raundunu şərh edən politoloq, Moskvanın şərtlərindən imtina etməyəcəyini bildirib.

“Biz bu prosesdə fəal iştirak edirik və daha da önəmlisi – Rusiya memorandumunun əsas tezislərinin formalaşdırılması şəklində siyasi-diplomatik vasitələrlə sülh sazişini, Moskvanın açıqladığı şərtlər və əsas prinsiplər əsasında imzalamağa hazırıq. Lakin realist olaraq gözəl anlayırıq ki, Zelenski hazırda bu sənədi imzalamayacaq, yaxud Ukrayna adından belə bir sazişi imzalamaq barədə göstəriş verməyəcək.

Təəssüf ki, Zelenskinin arxasında Avropa İttifaqı və Böyük Britaniya dayanır. Onlar isə Zelenskini Ukraynadakı hərbi əməliyyatları davam etdirməyə aktiv şəkildə təhrik edirlər. Bu səbəbdən Putin və Zelenski arasında görüş tamamilə nəzəri və çox az ehtimal olunan xarakter daşıyır, çünki Zelenski Rusiyanın təkliflərini qəbul etməyəcək”.

Korotçenko bildirib ki, nəticə olaraq, döyüş əməliyyatları cəbhə xətti boyunca əvvəlki intensivliklə davam edəcək.

Üstəlik, hücum təşəbbüsü Rusiya Silahlı Qüvvələrinin əlindədir:

“Hər gün Rusiya qoşunlarının yeni əraziləri nəzarət altına alması və yeni yaşayış məntəqələrinin azad edilməsi ilə bağlı məlumatlar gəlir. Bu baxımdan, ərazidəki reallıqlar, Ukraynanın hərbi məğlubiyyəti və darmadağın olması Kiyevin real vəziyyəti qəbul etməsinə səbəb olacaq.

Zelenskinin o vaxta qədər hələ də Ukraynanın rəhbəri olub-olmayacağını bilmirik. Lakin mühüm olan budur ki, Rusiya memorandumunda irəli sürülən siyasi hədəflərə yalnız hərbi uğurlar vasitəsilə nail ola bilər, Moskva da hazırda məhz bunu nümayiş etdirir”.

Bəs iki ölkə arasında sülh üçün Rusiyanın konkret təklifləri nədir?

“Əgər Zelenski Ukraynanın məğlubiyyətini, dörd yeni subyektin Rusiya Federasiyasının tərkibinə keçməsini qəbul etsə, Ukrayna ordusunu döyüş zonasından çıxarsa, Ukraynanın NATO-ya üzv olmayacağına dair məcburi razılaşma imzalasa, nüvə və digər kütləvi qırğın silahlarına sahib olmayacağına dair öhdəlik götürsə, eləcə də Ukrayna ordusunun sayına və silahlarının növlərinə dair məhdudiyyətləri qəbul etsə – biz həmin sazişi imzalamağa hazırıq.

Lakin realist olaraq yaxşı anlayırıq ki, bu baş verməyəcək. Buna görə də Trampın gözündə Rusiya danışıqları vicdanla aparıb, öz sülh planını təklif edib, lakin Zelenski bu planı rədd edib. Bu səbəbdən Rusiya Silahlı Qüvvələri, Putinin xüsusi hərbi əməliyyata başlamazdan əvvəl elan etdiyi məqsəd tam yerinə yetirilənə qədər, Ukrayna Silahlı Qüvvələrinə qarşı döyüşləri davam etdirəcək”, – deyə İ. Korotçenko əlavə edib.