Qarabağ Universitetinin tələbələri regional intellektual yarışda qalib olublar
Qarabağ Universitetinin tələbələri Zəfər Günü münasibətilə Azərbaycan Texnologiya Universitetində (ATU) keçirilən “Zəfərimiz əbədidir” adlı regional intellektual yarışda qalib olublar.
Universitetdən AZƏRTAC-a bildirilib ki, üç mərhələdən ibarət yarışda Qarabağ Universiteti birinci, Azərbaycan Dövlət Aqrar Universiteti (ADAU) ikinci, Bakı Dövlət Universitetinin (BDU) Qazax filialının tələbələri isə üçüncü yerdə qərarlaşıblar. Qalib komandalar müvafiq olaraq mükafatlandırılıblar.
İntellektual oyunda respublikanın 16 ali və orta ixtisas təhsili müəssisələrinin komandaları iştirak edib. Suallar əsasən Ulu Öndər Heydər Əliyevin fəaliyyəti, Zəfər tarixi və ümumi dünyagörüşü ilə bağlı olub.
Qeyd edək ki, yarışın keçirilməsində məqsəd gənclərin intellektual səviyyəsinin inkişaf etdirilməsinə, tariximiz və milli-mənəvi dəyərlərimiz haqqında biliklərinin genişləndirilməsinə, onların asudə vaxtlarının səmərəli təşkil edilməsinə şərait yaratmaqdır.
