Zoologiya İnstitutunun əməkdaşı Rusiyada tədqiqat aparıb

Bakı, 29 fevral, AZƏRTAC

Elm və Təhsil Nazirliyinin Zoologiya İnstitutunun Quru onurğalıları laboratoriyasının elmi işçisi Leyla Nadirli Rusiya Elmlər Akademiyasının Ural dairəsinin Yekaterinburq şəhəri Bitkilərin və Heyvanların Ekologiyası İnstitutunda elmi ezamiyyədə olub.

Elminfo.az xəbər verir ki, bu barədə AZƏRTAC-a Zoologiya İnstitutundan məlumat verilib. Bildirilib ki, məqsəd Azərbaycanın əsasən Böyük Qafqazdan və müqayisə üçün digər bölgələrindən əldə edilən çöl siçanları nümunələrinin molekulyar-genetik analizlərinin aparılması, həmçinin şəxsi toplanılan və Zoologiya İnstitutuna aid kolleksiya fondundan çöl siçanlarının kəllə və diş sümüklərinin müxtəlif metodlar vasitəsilə tədqiqinin öyrənilməsi olub. Elmi-tədqiqat işi Filogenetika və bioxronologiya laboratoriyasında laboratoriya müdiri dosent A.V.Borodinin rəhbərliyi ilə aparılıb.

Ezamiyyə müddətində çöl siçanları nümunələrindən mitoxondrial DNT-nin cytb geni üzrə yeni nukleotid ardıcıllıqları əldə edilib. Həmçinin çöl siçanları növlərinin kəllə sümüklərinin yaşı, dişlərinin morfotipikası və ölçüləri təyin edilib, statistik hesablamalar aparılıb.

Əldə edilən nəticələrin yerli və xarici nəşrlərdə çap edilməsi planlaşdırılır.