Rəqəmsal transformasiya artıq seçim deyil, strateji zərurətdir. Bu istiqamətdə atılan mühüm addımlardan biri olaraq, Azərbaycan Respublikasının Prezidenti cənab İlham Əliyev tərəfindən “Azərbaycan Respublikasında rəqəmsal inkişafın sürətləndirilməsinə dair 2026–2028-ci illər üçün Fəaliyyət Planı” təsdiq edilib. Bu sənəd ölkədə rəqəmsallaşmanın sürətlənməsi və biznes mühitinin yeni mərhələyə keçidi üçün əsas istiqamətləri müəyyən edir.
Bu istiqamətdə yaranan imkanlar artıq regionlarda da yeni təşəbbüslərlə öz əksini tapır.
MÜSİAD Azərbaycan, TECHERA və Quba İş Adamlarına Dəstək-QİAD Platformasının birgə təşkilatçılığı ilə Qubada “Regional Biznesin İnkişafı və Rəqəmsallaşma Sammiti” keçiriləcəkdir.
Azərbaycan Pedaqoji Universitetinin (ADPU) Quba filialının, Kiçik və Orta Biznesin İnkişafı Agentliyinin, Azərbaycan Sahibkarlar Konfederasiyasının, Azərbaycan Fintex Assosiasiyasının, “Bilim Azərbaycan”-nın, eləcə də müxtəlif şirkətlərin və media qurumlarının tərəfdaşlığı ilə keçiriləcək sammit regionda biznes mühitinin inkişafına və rəqəmsallaşmanın təşviqinə xidmət edəcəkdir.Tədbir 22 May 2026-ci ildə Quba Olimpiya, İdman, Təlim, Tədris və İstirahət Kompleksində keçiriləcəkdir.
Sammit çərçivəsində ilk dəfə olaraq “Regional Expo” sərgisi təşkil olunacaqdır. Bu sərgi yerli sahibkarların məhsul və xidmətlərini geniş auditoriyaya təqdim etməsi, yeni tərəfdaşlıqlar qurması və investisiya imkanlarını nümayiş etdirməsi baxımından sammitin ən önəmli və fərqləndirici hissələrindən biri olacaqdır.
Tədbir çərçivəsində panel müzakirələri, təqdimatlar və təcrübə paylaşımı sessiyaları keçiriləcək, rəqəmsal iqtisadiyyat, fintex, startaplar və ixrac imkanları əsas müzakirə mövzularını təşkil edəcəkdir.
Sammit dövlət, biznes və akademik dairələri bir araya gətirərək regionların iqtisadi potensialının daha effektiv istifadəsinə və dayanıqlı inkişafına töhfə verəcəkdir.
Sizi Regionun inkişafında aktiv rol almağa və gələcəyi birlikdə qurmağa dəvət edirik.
Mənbə: Modern.az
