2026/2027-ci tədris ili üzrə Azərbaycanın özəl ali təhsil müəssisələrində bakalavriat səviyyəsində ixtisaslar üzrə qəbul planı və illik təhsil haqları müəyyənləşib.
Modern.az-ın “Abituriyent” jurnalının 4-cü nömrəsindən əldə etdiyi məlumata görə, özəl universitetlərdə illik təhsil haqqı ixtisas, tədris dili və universitetdən asılı olaraq ciddi fərqlənir.
Belə ki, təqdim olunan qəbul planında ən yüksək məbləğ Xəzər Universitetində 5 500 manat, ən aşağı sabit təhsil haqlarından biri isə 2 000 manat səviyyəsindədir. Xəzər Universitetində bir sıra proqramlar üzrə təhsil haqqı sabit məbləğlə deyil, 0- 4 500, 0- 5 000 və 0- 5 500 manat intervalında göstərilib.
I ixtisas qrupu
Azərbaycan Kooperasiya Universitetində Ekologiya mühəndisliyi üzrə 100 plan yeri və 2 700 manat, Kompüter mühəndisliyi üzrə 40 yer və 2 700 manat, Qida mühəndisliyi üzrə 20 yer və 2 600 manat müəyyənləşdirilib. Şərabçılıq üzrə 100, Torpaqşünaslıq və aqrokimya üzrə 50, Yerquruluşu və daşınmaz əmlakın kadastrı üzrə 50 yer ayrılıb və bu proqramlarda illik təhsil haqqı 2 800 manatdır.
“Azərbaycan” Universitetində İnformasiya texnologiyaları üzrə 50 yer – 2 500 manat, İnformasiya təhlükəsizliyi üzrə 30 yer – 2 700 manat, Kompüter mühəndisliyi üzrə 30 yer – 2 500 manat müəyyən edilib. İnformasiya təhlükəsizliyinin ingilis dilində tədrisi üzrə 20 yer ayrılıb, illik ödəniş 3 000 manatdır.
Qərbi Kaspi Universitetində I qrup üzrə təhsil haqları 2 500-4 000 manat arasında dəyişir. Kompüter elmləri üzrə 40 yer – 3 800 manat, İnformasiya texnologiyaları və İnformasiya təhlükəsizliyi üzrə hər birində 40 yer – 4 000 manat, Kompüter mühəndisliyi üzrə 30 yer – 4 000 manatdır. İngilis dilində Kompüter elmləri üzrə 25 yer – 3 800 manat, İnformasiya texnologiyaları üzrə 30, İnformasiya təhlükəsizliyi üzrə 25, Kompüter mühəndisliyi üzrə 30 yer ayrılıb və son üç proqramın illik təhsil haqqı 4 000 manatdır.
Xəzər Universitetində Fizika müəllimliyi üzrə 10, onun ingilisdilli proqramında 5, Riyaziyyat və informatika (rəqəmsal bacarıqlar) müəllimliyi üzrə 40 yer ayrılıb. Kompüter elmləri üzrə 80, İnformasiya təhlükəsizliyi üzrə 50, Kompüter mühəndisliyi üzrə 100 yer nəzərdə tutulub. Burada proqramlardan asılı olaraq illik ödəniş 0 – 4 500 və 0 – 5 500 manat arasında göstərilib.
“Odlar Yurdu” Universitetində Riyaziyyat və informatika (rəqəmsal bacarıqlar) müəllimliyi üzrə 25 yer və 2 500 manat təhsil haqqı müəyyənləşdirilib. İnformasiya texnologiyaları, İnformasiya təhlükəsizliyi və Kompüter mühəndisliyi üzrə Azərbaycan və ingilis dilli proqramlarda illik ödəniş əsasən 3 000 manatdır.
Bakı Biznes Universitetində İnformasiya texnologiyaları üzrə 100, İnformasiya təhlükəsizliyi üzrə 30 plan yeri ayrılıb. Hər iki ixtisasın illik təhsil haqqı 2 700 manatdır.
II ixtisas qrupu
II qrup üzrə özəl universitetlərdə qəbul daha çox biznes, iqtisadiyyat, maliyyə, marketinq, menecment, mühasibat və turizm ixtisaslarını əhatə edir.
Azərbaycan Kooperasiya Universitetində Biznesin idarə edilməsi üzrə ümumilikdə 110, Marketinq üzrə 130, Menecment üzrə 30, Mühasibat üzrə 50 plan yeri ayrılıb. İqtisadiyyat üzrə 70, Maliyyə üzrə 80 yer nəzərdə tutulub. Təhsil haqları proqramdan asılı olaraq əsasən 2 200-2 800 manat arasında dəyişir.
“Azərbaycan” Universitetində Biznesin idarə edilməsi üzrə 70, İqtisadiyyat və Maliyyənin hər biri üzrə 20, Marketinq üzrə 70, Menecment üzrə 30, Mühasibat üzrə 50, Turizm işinin təşkili üzrə 80 yer ayrılıb. İngilis dilində də biznes, iqtisadiyyat, maliyyə, marketinq, menecment, mühasibat və turizm proqramlarına qəbul aparılır. Təhsil haqqı 2 000-3 000 manat arasındadır.
Qərbi Kaspi Universitetində Biznesin idarə edilməsi, Dövlət və bələdiyyə idarəetməsi, İqtisadiyyat, Maliyyə, Marketinq, Mühasibat, Turizm bələdçiliyi və Turizm işinin təşkili üzrə qəbul aparılır. Əyani proqramların böyük hissəsində illik ödəniş 3 800-3 900 manat, qiyabi proqramlarda isə 2 600 manatdır.
Xəzər Universitetində Coğrafiya müəllimliyi üzrə 10, Tarix və coğrafiya müəllimliyi üzrə 20 plan yeri ayrılıb. İngilis dilində Biznesin idarə edilməsi üzrə 50, İqtisadiyyat üzrə 30, Maliyyə üzrə 50, Marketinq üzrə 30, Menecment üzrə 20, Mühasibat üzrə 50, Turizm işinin təşkili üzrə 100 yer müəyyən edilib. İllik təhsil haqqının yuxarı həddi proqramdan asılı olaraq 4 500-5 500 manat arasında dəyişir.
“Odlar Yurdu” Universitetində biznes, iqtisadiyyat, maliyyə, marketinq, menecment, mühasibat və turizm üzrə Azərbaycan və ingilis dilli proqramlar mövcuddur. İllik təhsil haqqı əsasən 2 500-3 000 manat təşkil edir.
Bakı Biznes Universitetində ən böyük plan yerlərindən bəziləri Biznesin idarə edilməsi və Marketinq ixtisaslarına ayrılıb – hər biri üzrə 200 yer. Maliyyə və Mühasibat üzrə hər birində 125, İqtisadiyyat üzrə 60, Menecment üzrə 55 yer nəzərdə tutulub. Təhsil haqları əsasən 2 000-2 500 manatdır.
Bakı Avrasiya Universitetində Biznesin idarə edilməsi və Marketinq üzrə hər birində 100, İqtisadiyyat, Maliyyə və Mühasibat üzrə hər birində 90, Menecment üzrə 75 yer ayrılıb. Təhsil haqları əsasən 2 200-3 000 manat arasında dəyişir.
III ixtisas qrupu
Azərbaycan Kooperasiya Universitetində Təhsildə sosial-psixoloji xidmət üzrə 30, Regionşünaslıq üzrə 50, Tərcümə üzrə 60, Muzey, arxiv işi və abidələrin qorunması üzrə 100 yer ayrılıb. Sosial iş üzrə müxtəlif proqramlarda ümumilikdə 175 yer nəzərdə tutulub. Təhsil haqları 2 600-2 800 manat arasındadır.
“Azərbaycan” Universitetində Xüsusi pedaqogika, Təhsildə sosial-psixoloji xidmət, Beynəlxalq münasibətlər, Dövlət və ictimai münasibətlər, Fəlsəfə, Filologiya, Politologiya, Regionşünaslıq, Tarix, Tərcümə, Muzey, arxiv işi və abidələrin qorunması və Sosial iş üzrə qəbul aparılır. Təhsil haqları 2 500-3 200 manat arasında dəyişir.
Qərbi Kaspi Universitetində Təhsildə sosial-psixoloji xidmət, Beynəlxalq münasibətlər, Fəlsəfə, Filologiya, Politologiya, Regionşünaslıq, Tarix, Tərcümə və Sosial iş ixtisasları üzrə plan yerləri ayrılıb. Təhsil haqqı əsasən 3 000-3 500 manatdır.
Xəzər Universitetində Azərbaycan dili və ədəbiyyatı müəllimliyi üzrə 20, Xarici dil müəllimliyi üzrə 40, İbtidai sinif müəllimliyi üzrə iki proqramın hər birində 20, Tarix müəllimliyi üzrə 15 yer ayrılıb. Bundan başqa, Beynəlxalq münasibətlər, Filologiya, Politologiya, Regionşünaslıq və Tərcümə ixtisasları da mövcuddur. Təhsil haqqı proqramdan asılı olaraq 0 – 4 500 və 0 – 5 000 manat intervalında göstərilib.
“Odlar Yurdu” Universitetində Filologiya, Xarici dil müəllimliyi, Məktəbəqədər təhsil, Təhsildə sosial-psixoloji xidmət, Beynəlxalq münasibətlər, Tərcümə və Sosial iş üzrə qəbul aparılır. İllik ödəniş 3 000-3 500 manatdır.
Bakı Biznes Universitetində Tərcümə üzrə 90, Sosial iş üzrə isə əyani və qiyabi formada ümumilikdə 215 yer ayrılıb. Təhsil haqqı 2 000-2 500 manat arasında dəyişir.
Bakı Avrasiya Universitetində Beynəlxalq münasibətlər, Filologiya, Regionşünaslıq, Tərcümə və Sosial iş proqramları üzrə qəbul aparılır. İllik təhsil haqqı 2 200-3 000 manat arasındadır.
IV ixtisas qrupu
IV qrupda özəl universitetlər arasında proqram müxtəlifliyi nisbətən məhduddur.
Azərbaycan Kooperasiya Universitetində Ekologiya üzrə 60 plan yeri ayrılıb, illik təhsil haqqı 2 700 manatdır.
Qərbi Kaspi Universitetində Psixologiya üzrə Azərbaycan və ingilis dilli proqramların hər birində 30 yer, Biologiya üzrə 35, Biotexnologiya üzrə 20, Ekologiya üzrə 30, Su bioehtiyatları və akvakultura üzrə 50 yer ayrılıb. Təhsil haqları 3 000-3 500 manat arasında dəyişir.
Xəzər Universitetində Biologiya müəllimliyi üzrə 15, Kimya və biologiya müəllimliyi üzrə 60, Psixologiya üzrə 50, Biotexnologiya üzrə 25, Baytarlıq təbabəti üzrə Azərbaycan dilində 40, ingilis dilində 20 yer nəzərdə tutulub. Təhsil haqqı 0 – 4 500 manat intervalında göstərilib.
“Odlar Yurdu” Universitetində Psixologiya üzrə 30, ingilisdilli Psixologiya üzrə 25, Biologiya üzrə 35, Ekologiya üzrə 35 plan yeri ayrılıb. Təhsil haqqı 2 500-3 500 manat arasında dəyişir.
V ixtisas qrupu
V qrup üzrə təqdim olunan özəl universitetlər arasında əsas qəbul dizayn və incəsənət istiqamətlərindədir.
Qərbi Kaspi Universitetində Dizayn ixtisası üzrə Azərbaycan dilində 60, ingilis dilində isə 20 plan yeri ayrılıb. Hər iki proqram üzrə illik təhsil haqqı 3 500 manatdır.
Xəzər Universitetində Təsviri incəsənət müəllimliyi üzrə 20 yer ayrılıb və təhsil haqqı 0 – 4 500 manat intervalında göstərilib. Dizayn üzrə Azərbaycan və ingilis dilli proqramların hər birində 25 plan yeri nəzərdə tutulub və təhsil haqqı yenə 0-4 500 manat intervalındadır.
“Odlar Yurdu” Universitetində Dizayn üzrə Azərbaycan dilində 55 plan yeri və 3 000 manat, ingilis dilində isə 15 plan yeri və 3 300 manat illik təhsil haqqı müəyyən edilib.
Beləliklə, qəbul planının təhlili özəl ali məktəblərdə həm ixtisas seçimi, həm də təhsil haqları baxımından ciddi fərqlərin olduğunu göstərir. Təqdim olunan universitetlər arasında ən yüksək illik təhsil haqqının yuxarı həddi Xəzər Universitetində 5 500 manata çatır. Plan yerlərinin sayına görə isə ayrı-ayrı proqramlarda 100 və daha çox yer ayrıldığı, bəzi ixtisaslarda bu göstəricinin 200-ə çatdığı görünür.
Mənbə: Modern.az
