Bu qruplar üzrə 27 minə yaxın abituriyent tələbə ola bilməyəcək – PROQNOZ

“III ixtisas qrupu üzrə müsabiqənin daha gərgin keçəcəyi gözlənilir. Çünki ikinci cəhddə nəticəsini yaxşılaşdıran kifayət qədər abituriyent var”.

Modern.az xəbər verir ki, bu sözləri AzEdu.az-a təhsil eksperti Elçin Əfəndi deyib.

O bildirib ki, 5 iyul tarixində II və III ixtisas qrupları üzrə qəbul imtahanı keçirilib:

“Nəzərinizə çatdırım ki, 5 iyul tarixində II və III ixtisas qrupları üzrə qəbul imtahanı keçirildi. Bu imtahan həmin ixtisas qrupları üçün blok imtahanlarının sonuncu cəhdi idi. Həm II, həm də III ixtisas qrupları üzrə müsabiqədə iştirak edən abituriyentlərin sayına baxdıqda görürük ki, hər iki cəhddə iştirak edənlərin sayı mövcud plan yerlərinin sayından dəfələrlə çox olub.

İştirakçı sayının çoxluğu, təbii ki, keçid ballarına da müəyyən təsir göstərəcək. İmtahandan çıxan abituriyentlərin fikirlərinə nəzər saldıqda görürük ki, sorğulara əsasən, bəziləri tarix fənninin bir qədər çətin olduğunu bildirsələr də, ümumilikdə ikinci cəhdin birinci cəhdlə müqayisədə daha rahat keçdiyini qeyd ediblər.

Hazırkı vəziyyətdə III ixtisas qrupu üzrə müsabiqənin daha gərgin keçəcəyini deməyə əsas var. Çünki bu qrupda ikinci cəhddə nəticəsini yaxşılaşdıran kifayət qədər abituriyent var.

II ixtisas qrupunda isə həm birinci, həm də ikinci cəhddə müsabiqədə iştirak edənlərin sayı plan yerlərini üstələdiyindən, bəzi ixtisaslar üzrə keçid ballarında müəyyən dəyişikliklər baş verə bilər”.

Ekspertin sözlərinə görə, hazırda ən vacib məsələ ikinci cəhd imtahanının nəticələrinin elan olunmasıdır:

“Hazırda həmin nəticələri gözləyirik. Düşünürəm ki, nəticələr 25 iyul tarixinədək elan olunacaq. Hesab etmirəm ki, abituriyentlərin böyük əksəriyyəti müsabiqədə birinci cəhddə əldə etdikləri nəticə ilə iştirak edəcək. Çünki qeyd etdiyim kimi, ikinci cəhddə nəticəsini yaxşılaşdıran kifayət qədər abituriyent var.

Bununla belə, hər iki ixtisas qrupunda bu il də müsabiqədən kənarda qalan abituriyentlərin sayı çox olacaq. Məsələn, II ixtisas qrupunda 13 mindən çox, III ixtisas qrupunda isə 14 minə yaxın abituriyentin müsabiqədən kənarda qalacağı gözlənilir.

Eyni zamanda, bəzi ixtisaslar üzrə keçid ballarında da müəyyən dəyişikliklərin baş verəcəyi ehtimal olunur. Lakin ikinci cəhd imtahanının nəticələri elan olunduqdan sonra daha dəqiq proqnoz vermək mümkün olacaq”.